呢排母親節，父親節加上雙方母親生日，真係食到肚滿腸肥
呢三間酒家，詳細就唔多講（查實亦都無乜野講），只係想總結一下．．．
鴻星係最貴，但食物質素超晒班
就算近排做緊七五折，聽聞來料差左，但都超好味
較諸食物質素，東海就真係差到離晒譜
尖東果間，環境差唔在講，食物偏咸，真係好惡食
金龍船就好大碟，質素就普普通通，但侍應質素就麻麻地
無乜禮貌
呢一點銅鑼灣鴻星又係做得好好～
總括而言，鴻星win晒，只係價錢較貴～
2 comments June 18th, 2009
2009-03-15 Subway@亞士厘道
是人個肚甚餓，先去 locate Pizza Express 位置時遇巧 Subway，即時被佢香噴噴的焗麵包吸引。
入到去就叫左呢款包（查實唔記得叫乜名，讀都唔識讀，好似係意大利乜乜包咁上下），餡就傳統又係意大利唔知乜乜。
唔記得個名唔緊要，最緊要係夠香口，又夠好味。
一個餐仲可以揀包薯片同汽水，唔可以話抵到爛但都值得一試～
2009-03-15 Pizza Express@亞士厘道
食完 Subway，去左Gateway 行左陣，眼闊肚窄個肚仲有少少飽，但同行人士已經肚餓，所以點都要去食飯先。
今次去 Pizza Express 原因係上次送左兩張coupon，就係送上面呢款包。
前一次去呢款包係跟湯上，無醬料。今次單獨上碟就會送埋醬料，有香草醬，乾蕃茄醬，牛油三款。
我就最愛乾蕃茄醬，香口；香草醬就好似無乜味咁；至於牛油，我一向都麻麻地～
除左呢款包之外，仲有叫左個磨菇湯。
味道好濃，耐唔耐飲一次半次就得，成日飲應該就唔得掂～
Pizza 方面，就點左個羅馬兄弟批（印象中係咁上下名，不過家陣轉左款，好似無左），香口好味。比起之前去加州比薩，呢個真係可以話超晒班。
最後仲點左個蕃茄海鮮意粉，蕃茄味好濃，又係佳作。
可惜就係小弟真係好飽．．．．尤其是面對不停添飲的凍檸茶，真係豐富到極點～
2009-03-21 Pizza Express@太古城
一星期前食完Pizza Express，第二個星期即刻再去。原因係張coupon 就過期，點都要食埋去，順便當然要探下友人的寶貝女兒啦～
一行五人，其中一名係飲奶的BB，即係四個人食。
今次係點左兩個 set，加一個包仔。
部份相片，因為掛住湊B而無影到，不過都無所謂，最緊要係好味o既就影低晒～
其中一個set 要左個蒜蓉包，呢個大家可以記住，唔駛再去食，完全無蒜蓉味．．．．
雞肉凱撒沙律，一貫口味，唔錯唔錯～
焗菠菜闊條麵，有意外驚喜，好好味。可能因為我愛吃出面果層蕃茄醬～
最後一味羅勒菜意大利風乾肉薄餅（個名唔係咁叫，只係我又講唔出個名．．．），睇上去無上次果個咁膩，但一拎上手都係成手油。
不打緊，最緊要係好味～～
不過，食得多就會覺得風乾肉會比較咸～
2009-03-29 Pearl Vietnamese Restaurant@中環
同一間舖頭，兩個人，曾經不約而同地同唔同的人幫襯過。
今日，呢兩個人，就第一次一齊黎呢度食。
呢間越南菜館，係我仲嚮Kinetix 做，還在SFC 返工時，Terry Tam 約我黎食的。
呢度最大特式係，佢會好似茶樓咁，有個茶壺畀你斟茶飲，而唔係佢黎斟茶的～
味道方面，佢o既湯底比起出面大部份的越南菜為淡同清。另外，呢度係好湯河的，反而有米線同粉絲。
今次我地點左個牛肉湯米線，札肉雞絲湯米線，同埋越式春卷。
春卷新鮮滾熱辣，味道一流～～
2009-03-29 Cafe Habitu@灣仔
行完一輪街，坐電車時經過呢間舖頭，阿翼話想試下，所以即時落車入去幫襯。
其實呢間舖頭，都好多年了，但今次先係第一次入去。
兩個Cake Set，一個要粟子蛋糕跟Cappuccino，一個要朱古力蛋糕跟 Mocha。
蛋糕好香口，我其實都唔係太好食蛋糕，但呢度o既蛋糕真係不可不嘗。
之於咖啡，好香濃好滑。
去 Cafe 另外最講究係環境。呢度環境算唔錯，坐得好舒服，無開空調雖然有點焗，但其實坐多陣就會覺得無乜野。
反而，附近有一兩張檯o既顧客不停支支喳喳，影響當時環境。
最後一提，你有幫襯，佢張receipt 上面會有 Wi-Fi password，方便大家上網自娛。
2009-03-29 Uno Mas@灣仔
是日睇完Cerwin 報導，於是乎上門一試。
呢度主要係食 Tapas。Tapas 其實係以前西班牙人，飲酒時嚮杯上會放d 佐酒小吃，果個就係Tapas。久而久之，上面d 小吃反而成為左主流，所以Tapas 的餐廳亦由此誕生。
先點左個白酒，酸酸地，用黎伴菜唔錯。
焗芝士，幾香口，但食得太多會有點滯。
炒雜菇，呢味係我今餐最愛，口感幾好，唔會有膩的感覺。
送的麵包條，脆口的，但都係果句，食得多會好滯，你睇我就係一個人版，錯晒～～
焗薯波，我一路都以為係薯條，原來係薯波。香口野，一定好味，比起焗芝士而言，無咁滯口。
牛肉伴包，下面件包吸晒油，但就較難切同咬。所以好多時會牛肉還牛肉，包還包。牛肉係香口，但因為難以牛肉伴包一齊食，所以難免扣左少少分數。
原隻烤魷魚，係好味o架。但當時實在太滯，加上佢入面饟左d 辣肉豆，辣之餘仲更加滯～
海鮮雜燴，呢味我已經食唔出咩味。一來真係好滯，二來果日其實係帶病上場，味覺係會差d。
其實呢間Uno Mas 算 OK，可惜唔夠我口味je。
睇住menu，又唔太鍾意食魚，羊又唔太食，太腥的我地又怕，所以結果對我地黎講選擇左少左d。
今期相片及食評就寫完～
之後幾次去食野都無影相，所以都懶得去食lu～
有機會再繼續～
Add comment May 6th, 2009
2009-01-11 牛陣@apm
呢次去牛陣, 兩個人叫左個最平o既餐.
基本上, 食完第一碟都飽左八成. 感覺上, Shabu Shabu 除左嚮日本食的和牛分得出靚同唔靚之外, 嚮香港真係分別唔大 (除左果d 極貴o既舖頭, 因為太貴未試過…). 所以嚮香港食 Shabu Shabu, 個湯底就好重要…
但又其實, 個湯底黎黎去去都應該係果d 牛肉火鍋專用o既汁溝成, 食o既時候加上芝麻醬, 理論上又同嚮屋企自己整無乜分別.
唯一分別係, 嚮街食飽就閃, 嚮屋企仲要做清潔~
2009-02-14 Brunch Club@Central
之前Wing Chu Mam 帶隊去中環 Brunch Club 食野, 一直都想再去過, 結果今次我地兩丁友仔決定再闖此地.
先唔好講食物, 一入去鬼佬就叫我地坐近門口果檯.
OK~ 無問題~
點知轉頭另一名講廣東話的帶位, 又叫我地坐入去入面的露天茶座.
OK~ 又無問題~
又點知我地一起身, 果鬼佬又問我地唔滿意咩!? 點解要坐出去…
頂! 同你講你另外果位先生叫我地出去坐, 又你唔 like. 不如你兩位攪清楚先啦…
出到去坐低, 望下餐牌…. 硬係覺得同以前唔同左…
好似無咁多花款, 個吸引力亦都大減….
食物水準尚算保持到, 只係款式真係少左… 好彩隔離檯果兩隻爹利仔夠攪笑又為食, 為今次食程增添不少歡樂~
2009-02-14 Fat Burger@灣仔
你無睇錯, 我無打錯.
N 個星期前, 即係食完 Spuntini 果晚, 已經決定今期情人節去食 Fat Burger.
今期我唔玩排名, 齋講食~
味道唔差, 可惜種類太少.
一件漢堡包餐, 一雞三味, 可分為單層, 雙層同三層. 咁就當三款, 實在型得無話可說.
呢個情況下, 我只好食個雞包仔.
還好雞包仔唔單止賣相唔差, 食落都幾好味. 漢堡包內的年肉都尚算有肉汁, 未算有驚喜但總算唔會想唔食.
另外, 洋蔥圈都幾油下, 食完都幾滯. 薯條分粗幼兩款, 叫左客粗薯條口感一流.
事實係, 我應該都唔會回頭食第二次. 唔係因為唔好味, 但又真係無乜特別, 除非路過我又口痕想食粗薯條啦….
估唔到, 結果係個薯條令我有最深印象~
2009-02-23 Wanya@Central 新世界大廈
聽聞好正, 心諗仲要嚮中環開舖, 應該無問題. 所以決意為阿翼呢個超早預祝生日飯局去呢度訂位.
當日正正係我呢期病患週期的最早期, 是日頭痛到無朋友, 依舊死頂住去食呢餐.
侍應介紹, 今日三款任食, 日式火鍋, 爐端燒, 鐵板燒每人揀一個主題. 望過下爐端燒d 野食唔係好o岩食. 所以就要左日式火鍋加鐵板燒.
每人仲會送多一小食, 我就要左個芝士燒帶子, 阿翼就要左個汁煮阿嬌… sorry!! 係汁煮鮑魚…
隻鮑魚呢.. 唔乾唔腥唔難咬, 值得一讚.
芝士燒帶子.. 香口惹味, 唔錯.
未諗到叫咩野食, 侍應即時幫我地落左客刺身拼盤.
因為得我一個人食生野, 所以到最後刺身拼盤都只係出現過一次咁大把. 不過, 一次就夠晒數, 只因除左三文魚同墨魚之外, 其他野都麻麻地.
隻帶子仲要有種好似剛剛嚮雪櫃拎出黎的冰冷感….
日式火鍋, 有和牛食, 但一次只係得幾塊, 仲要係平常牛肉的五分一size, 真係食左落口都唔知.
仲有隻和牛肉粒, 太難咬, 唔推介. 普通牛肉都黎過 (其實係佢落錯單), 我自己去大昌買一盒好過!
因為呢晚唔係太舒服, 所以連相都無乜心機影, 食過d 乜都唔係太記得…
印象中, 魚翅小手卷出奇地好正!! 我一食再食!!
炸日本菇唔知係唔係來料平, 又出奇地佢畀好大份, 但又實在唔係咁好食, 咁大份都唔知點食得晒…
雞軟骨無想像中咁咸, 但就乾身得滯. 仲有炸薯餅咁o既物體, 我食完都無印象… 真大鑊.
呢晚記憶異常混亂, 只係得出個結論…. 真係你請我我都唔會再去…
2009-03-01 吉@CWB 世貿
是日為病壞 N 部的第二部, 無端端個頭又痛到爆…
去到吉, 預左要等位, 但今次又無上次等咁耐.
可能因為今晚我地早左出去等, 上次等左半個幾一個鐘咁滯, 都仲差十幾張籌, 問你死未!?
今次一入去, 望下餐牌… 死火, 唔通真係頭痛到傻左!? 硬係覺得無乜野o岩食!?
貪心的人一定叫拼盤, 諗住實無死.
於是乎, 一客炸蠔拼豬扒, 一客炸蝦拼帶子. 兩位share 變為一碟上, 所以應該叫做炸 * (蠔 加 豬扒 加 蝦 加 帶子)~
帶子一口咬落去, 皮肉分開左, 變相我先食炸皮後食肉. 但味道唔差, 個粉又唔厚~
炸蠔咬落去都好鮮味, 但點都唔夠豬扒同蝦好食!
唔怪之得, 個個都係單叫炸蝦炸豬扒, 因為咁叫的話最好味的蝦和豬扒都會多幾件ma, 真係死蠢~
白飯同椰菜絲係任食的, 我都 encore 左椰菜絲兩次.
不過又係唔係咁舒服, 所以令我食慾大減, 食完都想快d 走…
加上右邊果檯條阿炳, 全程尤如私隱線般未停過口講野, 仲要同條女不停講 notebook 果下抵死.
條女又識回應喎, 真係郎才女貌! 最衰無影佢相, 否則問問小巴, 是否其同行. 不過點都好, 呢條人兄的煩嫌程度, 令我頭痛加劇左幾倍, 陰公!
對於呢間野o既結論係, 有得食的, 又唔駛排咁耐隊的話, 我會回頭幫襯.
雖則我事後話平d 食大戶屋都無所謂, 但去完大戶屋, 又會覺得都係貴d 去番吉食會好d~
一口氣講住咁多先, 下期再續, 密切留意下期 Pizza Express Double Kill, 不同時間人物但同地點的明珠越南餐廳, 超出預期的 Cafe Habitu, 病壞第三部曲之 Uno Mas.
88~
2 comments April 9th, 2009
一月八日，時直入伙兩周年，看過 Spuntini 的評價，有讚無彈，所以決定試下～
圈起的menu，很得意，但當拆開看起來卻有點不便～
麵包任食，左邊的樽見慣不怪。反而右邊的水杯，底部是圓的，有幾次我差點以為自己會倒反了水
送你一個特寫
第一道菜 Smoked Seafood Sampling Plates
有煙吞拿魚，煙鱘魚，煙三文魚，魚子醬帶子
Chicken Salad
Beef Lasagne, Mozzarella & Ricotta Cheese
若未將Mozzarella, Ricotta Cheese 撈混，Beef Lasagne實在很咸。
撈混後味道很好～～
Risotto with Parma Ham & Rocket Lettuce
第一啖沒有太大問題，吃最後一啖時才覺 Parma Ham 很咸。
份量本身不多，吃過 Lasagne後，再吃少量Parma Ham 就有點滯的感覺～
Risotto 很不錯，至少比我們自家制的乾身。
Mini Tart
Tart 皮很重粉，只有朱古力Tiramisu 那件較好
Mini Tiramisu
很不錯的 Tiramisu
值得一提，杯底都是略圓的。
我估是店主希望大家不要過於懶惰，進餐時，應該雙手一起用～
總括而言，這一餐很滿足，味道蠻不錯～
當我走到櫥窗前，職員會為我一一解說（抱歉，英文能力有限，當時只聽得懂三分二，尤其是食物名稱）～
因為這一帶都算是較高級的食肆地段（聖蘭士街，星街，等等．．．），故以這價錢，在這種氣氛底下享受一餐美食，算是化算～
價錢
Smoke Seafood Sampling Plates $110
Chicken Salad $72
Beef Lasagne, Mozzarella & Ricotta Cheese $98
Risotto with Parma Ham & Rocket Lettuce $88
WOM White 50 $50
WOM Rosa 45 $45
Mini Tiramisu $33
Dessert of the Day (Mini Tart) $48
Service Charge 10%
Total $598.00
地址 : 灣仔聖佛蘭士街4-6號地下A店
電話 : 2528 1060
營業時間 : 星期日至五: 11:00-23:00; 星期六: 11:00-00:00
2 comments January 14th, 2009
在我心中, 香港我有幫襯過的 Burgers, 排名本身大致如下.
1. Shake n Bun
2. Burger King
3. McDonald
4. Triple O
呢度只計漢堡專門店, 另外部份嚮 OutBack, Rudy Tuesday 等地方食過o既, 我就唔計啦~
但自從偶爾嚮北角幫襯過呢間 The Big Bite. Shake n Bun o既排位即時下降.
原因係, The Big Bite o既 size 比較適中, 而且我比較鍾意食佢o既小食.
價錢方面, 亦都比起 Shake n Bun 平少少. 而且又唔駛好似 Shake n Bun 要等位時仲要坐高凳咁辛苦.
加上近來再去 Shake n Bun, 唔知係唔係人流多左, 所以覺得個包無以前咁香口.
唔好講咁多, 先去一去相~
很搶眼的標貼, 呢個一睇就知係 Cheese Burger BBC
BBC 即係 Back Bacon Cheese.
另外一個標貼係用上紅色, 更 sharp!
呢個係招牌貨, The Big Bite.
先睇睇 BBC. 入面d 料一d 都唔少, 個包都幾厚下.
要我咁大個口先可以一啖一口 (我影得唔好, 所以睇唔清楚塊漢堡).
呢個包唯一問題就係比較多筋.
另外需要注意o既係, 佢d 洋蔥都幾辣下!
再睇睇 The Big Bite!
Classic 5 and 1/3 oz beef Burger!
正!
淋上牛肉汁的芝士薯條 (Poutine).
個人認為呢個必食, 不過要堂食. 當日我係外賣, 所以薯條就稔左少少, 但都好好味!
薯條方面, 另外仲有個 New York Fries and Chilli Cheese Fries.
Chilli Cheese Fries 都幾辣下, 肉醬分怖不太平均, 有時會變左淨食肉醬.
我另一至愛, 洋蔥圈!
說實話, 到今時今日, 我都係比較鍾意食 OutBack o既洋蔥球.
基本上, 大家可以點一個 Sets with any burger or hotdog
Regular Set - Fries and soft drink + $18
Poutine Set - Poutine and soft drink + $28
Chilli Set - Cheese Chilli Fries and soft drink + $31
The Big Bite 有樣野都幾似 Shake n Bun, 佢地都有得自助加酸瓜等配料.
但個包實在太大… 所以我次次都無加.
仲有, 除左以上漢堡之外.
我仲會推介 Bak Goo! (Mushroom Burger), The Jerk (Chicken burger with jerk chicken spice). 呢兩款都好惹味的!
有讚亦有彈.
除左之前提過 Back Bacon 比較多筋之外. 外賣時, 佢地係無膠袋載汽水.
我都支持環保… 但用紙袋實在係好易穿…. 我托住個底拎返屋企, 都漏到成手都係….
Anyway, 有興趣o既不妨一試.
The Big Bite
Address: Shop U12, FitFort, 560 King’s Road, North Point, Hong Kong
Tel: 2155-1066
4 comments June 6th, 2008
禽晚放工後, 相約阿翼及其父母親到佐敦新華記食火鍋.
較諸以往的牛皇, 新華記的牛肉可算不上最靚.
而且當日牛皇那魷魚兩吃 (酥炸及火鍋), 和那象拔蚝刺身, 實在令我印象深刻.
故新華記對我而言時有點比下去的.
但若然和萬發比較, 其牛肉卻很嫩口, 一淥就可放入口.
另外, 那個大蜆也很美味.
不得不提的是那個炸魚片頭 (不是火鍋配料), 即叫即炸, 新鮮熱辣, 配上酸甜醬, 一流!
雖然在我心目中的評級不及牛皇好.
但可見其豬骨煲用上的都是種豬桶骨, 不是街外那些求其是但的豬骨可以比擬.
儘管本人不太愛吸食骨髓, 也不愛品嚐豬骨, 但仍要一讚這個火鍋的材料.
最後, 我點了一支蔗汁, 略嫌太甜, 不知是否混進了大量糖水之故.
總括而言, 未必會專登去食.
但行開果頭, 又想食火鍋的話, 新華記亦算得上一個不錯的選擇.
地址 : 佐敦廟街286-289號地下D及E鋪
電話 : 2736 2236
營業時間 : 18:00-05:00
4 comments April 15th, 2008
二月十二號因為大家避免嚮情人節當天捱貴餐, 而且順路幫廿一畀 deposit, 所以決定於當天去九龍灣德福的 C’est bon 一嘗法國菜.
C’est bon 環境不俗, 加上昏暗的燈光, 令飯後的我更加上訓教.
店內所有員工都十分有禮貌, 不知道這是否所有法國餐都是如此.
一看menu, 大致上有三款一人份的 dinner set, 另加一款二人份的 dinner set.
基於大家都不太愛吃羊, 阿翼不吃雞, 亦不太想吃牛, 更不會吃 Cold Seafood, 因而點了一個二人份的 dinner set - Lobster (龍蝦) Set For Two, 另加一客鵝肝.
這個餐被我嘲笑為意粉屋餐.
因為有龍蝦湯, 龍蝦意粉和龍蝦飯. 這還不是在意粉屋也可以食到嗎!?
就連左隣的兩檯人, 看過menu 也忍不住說不會點這個餐, 因為龍蝦在外間不難找到.
先說一下菜式
先有各式麵包 (還可以添吃)
頭盤有三文魚他他
湯有干邑龍蝦湯或黑松露雜菇湯
另加一件香煎鵝肝
主菜有龍蝦意天使麵和龍蝦飯
最後還有甜品
麵包意外地可口.
想不到三文魚他他蠻好吃. 可惜阿翼不吃生的食物, 吃了兩啖就停下來.
湯款我們彼此一人要一款, 結果是兩款我都喝下. 干邑龍蝦湯味道較濃, 有一點兒酒的味道; 黑松露雜菇湯卻有種青澀味, 還以為黑松露會是甚麼怪味.
若要我嚴選的話, 我還是會選擇黑松露雜菇湯.
這是我頭一次嘗鵝肝. 這道香煎鵝肝, 外面煎得很爽脆, 內裏卻是很軟身的.
硬要我以另一種食物去形容那口感的話, 內裏就像生的豬潤. 而味道還可以, 反正都是很香口.
鵝肝下有一隻很像日式煎蛋的東西, 很好味!
龍蝦意天使麵和龍蝦飯, 基本上是以一隻龍蝦開邊成為兩碟主菜.
肉質不錯, 配上天使麵和濃汁, 比起意式的味道, 感覺上更為濃更為醇. 我估計這個濃汁也是以龍蝦烹調吧.
龍蝦飯的飯, 不是一般的飯. 像Risotto 這類意式飯, 口感會有點粗糙和硬的感覺.
較諸我們自己所煮的, 這個 risotto 不會太咸. 不過本人還是比較愛「吃軟飯」…. 哈哈哈
最後, 甜品我點了一客心太軟, 而阿翼就點了一客黑白朱古力摩士.
第一次食心太軟, 覺得頗好味, 可能是本人比較喜歡醬汁等等此類的食品吧.
阿翼叫我嘗了一口朱古力摩士, 還可以. 但談不上有甚麼特別.
另外順帶一提, 是次我們沒有點選紅酒.
反而點了一杯 Mix Fruit Juice.
我點的是 Strawberry mix with Orange Juice, 阿翼的是 Banana mix with Orange Juice.
Banana 那杯 Banana 的味道蓋過了 Orange, 我不太喜歡. 反而Strawberry 不單止沒有蓋過 Orange Juice, 而且攪伴過的 Strawberry 粒粒口感一流.
全個晚餐價錢如下
Special Drink Promotion 2 x $18 - $36
Lobster Set for Two 1 x $520 - $ 520
Add Foie Gras 1 x $70 - $70
Sub-Total - $626
Grand Total - $689
C’est Bon
地址 : 九龍灣德福廣場2期419-422A舖
電話 : 2997 2899
營業時間 : 星期一至星期日: 11:45-23:00; 18:00-23:00
座位數目 : 90
泊車資料 : 德褔廣場 2 期 (於商場內消費滿$300，免費泊車兩小時)
訂桌資料 : 設有訂檯
付款方法 : Visa , Master , 現金 | 10% 服務費
招牌菜 : 鵝肝 , 石斑 , 牛柳 , 紅酒 , 白酒 , 羊扒
設備或服務 : 酒精飲品
介紹 : C’est Bon 為小數有情調的法國餐廳，有不同類型的紅酒、白酒供客人飲用，以正宗的方法烹調菜式。
Add comment February 15th, 2008
| S | M | T | W | T | F | S |
|---|---|---|---|---|---|---|
| « Aug | ||||||
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
