Posts filed under 'Cha-Cha-us'
七月過去了，八月中都就黎過埋，家陣先得閑打下野～
基本上，查查黎左之後，之前收埋左的檯都掉左，另外買左個上牆的摺檯
一來方便我地自己，二來亦都增加左活動空間
試過將梳化腳拆埋，但唔好坐之餘，仲有點不平，所以都係砌番，尤得小鬼跑入去玩～
七月尾可算做左好多野
佢開始食魚油丸啦，又開始習慣帶狗帶
另外又打埋第三支針，食晒杜蟲藥同心絲蟲藥，亦都滴左殺虱水
我地見佢毛多又厚，亦都剷走左好多毛～
我地聽跑馬地寵物店長講，買左隻狗仔公仔布魯圖，一來陪佢玩，二來有時錫下隻公仔，等小鬼妒忌，要學得乖點
最好笑係，有次佢唔肯帶狗帶，我就幫布魯圖帶上狗帶，扮帶佢去街～
之後返黎，小鬼不知幾咁乖，肯帶上狗帶～
八月來到，小鬼有能力突破二號閘
始終都係偏左少少．．．
所以全個八月，我地加糧，亦都開始同佢玩下跑下後先畀佢食野
等佢食得多之餘，又唔會肥得滯
結果呢排佢過唔到二號閘了～
半個八月，查查表現得時而開心，時而悶悶不樂
有人話，因為天氣唔穩定，都會令佢地心情不佳喎～
家陣佢學識 hand hand 了～
不過就 sit 親都 hand，想教佢 stay 就要花多點時間同心機～
August 14th, 2009
苦惱沿於查查前兩日總共食過三次『吾吾』
苦惱沿於好心買左塊Cooling 板畀佢，但呢兩日佢嚮入面痾左四五次尿
好彩今朝見佢『吾』左兩次，都係望住無食．．．．
但阿翼話佢lunch 返去時，佢又食喎．．．
唔通真係因為新買包零食特別香口，令佢食完d 『吾』都香d，所以忍唔住要自己食番！？
July 23rd, 2009
由對上果日開始，持續了多達十日的戰爭
事實上，革命尚未成功，同志仍需努力
呢段日子裏，查查嘔左三次
翻查過後，應該係餓過饑所引致
大家唔好誤會，我無虐待佢，實際上我畀幾多佢食都好，佢都唔係食好多
早排仲有數得計，呢排早就食十粒，夜晚無端端可以同你食足九十幾粒
之前果隻糧，我聞上去都好重阿華田味
睇過係兩星糧，所以盡早就同佢轉過隻五星糧
係就係淡ｄ，但話晒都有三文魚，我都想餐餐有三文魚刺身食．．．
頭一日好慘烈，唔食
之後諗下係唔係太大粒太硬，所以就好辛苦咁握碎佢，真係十隻指頭都爛晒
食就肯食，但就食到周圍都係．．．
久而久之，可以唔駛握碎，但如上所言，份量真係好唔定
除左份量好唔定之外，佢就連食野都好唔定
基本上佢一定要有人陪住佢食，當我地行開時，佢會走過黎望住我地
要我地行番過去，叫佢返去食，佢先走番過去
咁樣好唔掂，無理由下下等佢食，所以我都決定左佢唔食我都唔會理佢，佢餓就自己會食，最多放耐多一陣
食野唔定之外，洗耳唔定，梳毛仲唔定，洗眼．．．．就更加唔定
洗耳要用九牛二虎之力，先能夠完成，佢一望到就縮
就算我抱到佢實一實，佢一於擰開一邊唔畀我洗
好啦，滴到啦，一滴佢就係咁玩水髮．．．．
都幾累
梳毛就要用十二牛四虎之力
一來抱佢o既方法較難，二來佢會擰過黎咬梳順便抽水咬埋我
一梳到打結o既地方，又要先拉住d 毛，慢慢黎
一個人只得一對手，抱得黎又要梳又要拉住d 毛，都幾難攪
隻小鬼仲要鬼咁多打結，真係煩到阿媽都唔認得
洗眼．．．我估計用到廿牛十虎之力
唔好話咩，抱起，佢一見有野嚮佢頭頂，佢就係咁撐
試過鬆手佢就走，真係好驚咁．．．
事後去舖頭問，十隻狗有廿隻都唔鍾意人攪
佢係咁ｅ示範點洗眼，本身圍住一齊o既狗隻，只要佢一拎起支洗眼水，全部即時散開
講開洗野，早前我地怕凍親佢，一直都敢濕洗
咁佢阿媽就買左支乾洗粉啦
嚮個企缸度，好似拍緊劉華同陳慧琳的『我不夠愛你』咁，攬住佢 tum 佢乾洗
點知一落粉去身上，佢即時好似甄子丹上身咁，嚮個地上蜈蚣彈黎彈去，我忍唔住笑左幾耐呀．．．．
結果，只好好似捉住精神病人咁，一手按佢心口嚮地，一手按頭
又係累到抽筋（我真係跪到抽筋．．．）
除左乾洗之外，洗耳都會表現蜈蚣彈．．．．
攪笑在佢嚮我面前彈彈下，就要走番去佢阿媽面前再彈
我掉過波過去，佢玩兩下又再彈過
都唔知佢堅定流
好笑野講到咁上下，之後就講下勞氣野
先頭話佢唔定，我覺得佢甚至乎係無耐性！！
同我玩搶公仔，跳左一陣唔夠我黎，就開始想『胡』我，仲要發老脾走左去，叫都唔理
買左個智力球佢買，解左第一粒野食，第二粒佢就推開個波唔玩．．．
可能頭三日太錫佢啦，變左之後只要稍稍減少同佢玩，又或者行開做自己野，佢就唔多高興
佢頭幾日已經識去廁盤，但好明顯，有好幾次佢硬係走番出黎，去第二度大小便
激到我地呢．．．．
結果有次我忍唔住打佢左一鑊，仲抱起佢鬧，鬧完就『娥』佢
所以佢家陣比較驚我同唔多痴我（無人時就痴我，有其他人就唔ｓｏ我）
佢痴阿媽，但都恰阿媽
佢下下咬落去，都見洞的
阿媽忍忍下，終於都有一ｄａｙ我唔嚮屋企時，打左佢一鑊
但唔同在於，我打完，佢會粒水行開
阿媽打完，隻衰仔係會痴住阿媽ｔｕｍ番佢
可能佢知阿媽係最後防線，一嬲埋就大鑊呱．．．
好多人會話佢有冇咁醒呀．．
真係好精的．．．
十號砌好個圍欄，果晚佢就 Prison Break 左出黎
有一次我地陰佢，佢古古惑惑咁 Prison Break 後仲要偷紙巾
畀我見到佢呆一呆後，九秒九速逃！
仲有隔離屋隔住隻窗叫佢，佢都認得呢．．．
知道人地唔恰得，人地點抱住佢梳毛都無問題．．．
最離譜係，佢發左我全日老脾，唔睬左我一日
件事係，明明係佢自己嚮個籠度賴尿，全身都濕晒
咁我當然邊清潔邊話佢，點知，佢應該係嫌自己臭，唔開心喎！
野又唔食，叫又唔理
家陣你賴尿關我咩事！！！
就係呢單野，結果禽日我地就去買左支狗狗沖澡液，進行左第一次濕洗
好彩，佢都算 enjoy 個過程，無乜大反應～
其實呢十日入面，最大的問題，就係自己的想法同心理
就佢好，打佢好？
ｔｕｍ佢好，鬧佢好？
由得佢好，罰佢困住佢好？
好多矛盾，亦好多不明的事要我地自己去感受同make decision
回頭一睇，佢黎左亦只不過係兩個禮拜，而佢亦只不過得四個月大
好多野，都係要繼續努力慢慢去感受同學習相處
July 21st, 2009
仲有六日就四個月大的查查，禽日上磅有兩磅幾，唔知大過左之後會幾大隻呢～
查實我呢世仔，除左BB仔時代自己『唔唔』完，自己拎番黎玩過一次咁大把之外，都真係未拎過上手（更何況拿屎上身！？）
呢隻小鬼一黎，我就連續執左三日
好彩，其實只有兩三次係四圍『唔唔』
雖然話就話會去自己個便盤度解決，但都要望住佢一有咩唔妥就要拿拿聲捉佢返去個便盤度，否則都有隨地黎料的可能性
咁大個仔，朝朝早好似服侍老爺咁
整好野食，放佢出黎，畀佢食野，等佢『唔唔』，求佢畀我幫佢抺腳清潔
不過呢位幕後大老爺，都真係幾好得意～
曳係曳d，但睇住佢想攝入梳化條『那』度
點知成張梳化由我改裝後，佢唔再夠位入，卡住左
一向後跳，嘗試翻身出番黎，點知倒頭一跌．．． 都真係幾爆笑～
今日整埋個圍欄，局限佢自由空間後，我估我地應該會無咁辛苦，而佢亦唔駛因為我地要行開行埋，或者抺地清潔而入番個籠
一家便宜兩家著～
July 10th, 2009
2009.07.05 是近來的一個大日子
新成員的加入，讓家裏的氣氛改變了不少
這頭讓本少爺一而再，再而三折騰的小魔怪，教人又愛又恨
Red：Toy：Poodle，是其簡而潔的介紹
時值逛街中，本打算『視窗購物』的我，估不到就如別人所說到結婚展覽一樣
只要一進場，沒有空手離場的可能
這快打旋風般的攻勢，像周董哼著『．．來得太快就像龍捲風，離不開暴風圈，來不及逃』
無奈晚飯未進，先來個空手離場的一勝優勢
小魔怪的大名，在整頓快速的晚飯中，由我一人碎碎念的『念』出來
甚麼A-Z，蝦米腸，炸兩，餐腿麵，奶醬厚多士都給我說盡
最後，Rody 本是不錯的選擇，但音調又有點兒沉
結果，深啡的多叫朱古力，那啡紅的就叫奶茶吧
說時遲那時快，媽媽的一句疊字稱呼，就由『奶茶』變成『查查』
因為媽媽叫Chara，囝囝就叫 Cha-Cha，那爸爸叫．．．．爸爸．．．（＝＿＝）很沒格調．．．．
回到家中，花了整整兩小時才安頓好小魔怪．．．
就連吃的，也因初次照料而弄得一頭煙
還要等他便便，好讓他學懂那兒是其便所
結果，還不是在籠內小解．．．．
便便吧．．．爸爸在御手洗陪等了半小時，也只有呆等，沒有便便．．．．
到訪隣座，欲詢問 Eason （你沒看錯，我沒打錯，的確是 Eason）一般起居小便的設定，友隣義不容辭的就進來詳解
那刻才得知一個恍如霹靂的消息．．．．
早陣子，Eason 因病離開了我們
這刻回想起這位小隣居，也忍不住想哭的感覺
沒有 Eason，我想大概就沒有 Cha-Cha 吧～
還記得第一次見面，兩家門口齊開，這頭松鼠 Eason，氣定神閑的入了我們家
就像經理般，走了一圈，巡視完業務才施施然離開
就這樣，我就想找個『徐x瑩』來襯一襯 Eason
幸好，Eason 離開那天，一家人都剛剛齊齊整整的在場
讓他可以不用孤單的離去
Someone come; Someone gone．．
在這為 Eason 默哀
July 7th, 2009
